Кулун тутар 16 күнүгэр Саха Өрөспүүбүлүкэтин култууратын туйгуна, Саха Өрөспүүбүлүкэтин ырыа айааччыларын сойууһун чилиэнэ, самодеятельнай мелодист, аккомпониатор Александр Петрович Меркулов 65 – сылыгар аналлаах " Ырыа-дууһам иэйитэ" кинигэ сүрэхтэниитэ уонна ахтыы дьоро күнэ буолла. Кинигэҕэ ырыа куттаах, дэгиттэр талааннаах Александр Меркулов олоҕун, айар үлэтин туһунан , дьиэ кэргэнин, үөлээннээхтэрин, култуура эйгэтигэр өр сылларга үлэлээбит доҕотторун ахтыылара, ону тэҥэ кини айбыт ырыалара нотаҕа тиһиллэн киирдилэр. Автор ырыалара музыка абыгар ылларан төрөөбүт дойдутун айылҕатын хоһуйан, дьонугар сэргэтигэр истиҥ тапталын иэйиилээхтик туойаллар. Кинигэ самодеятельнай бөлөхтөргө , музыкальнай оскуолаларга уонна бары ырыаны таптааччыларга ананар. Кинигэ ООО компания Дани Алмас кинигэ кыһатыгар 150 ахсаанынан, 112 сирэйинэн 2024 с бэчээттэнэн таҕыста. Александр Петрович Меркулов биир дойдулаахтара, Өймөкөөнтөн, Уус - Алдантан, Дьокуускай куораттан уонна бииргэ алтыспыт дьонноро, үлэлээбит коллегалара Александр Петрович Меркулов сырдык аатын үйэтитэн истиҥ, иһирэх тылларынан ахтан санаан аастылар.