Ыам ыйын 22 күнүгэр Хомустаах 2-с нэһилиэгэр сайыны көрсүү сиэрэ-туома ыытылынна. Нэһилиэкпит ытыктанар киһитэ Лидия Егоровна Пестрякова - Үүнэр кыыһа Намыйа Үрдүк Айыыларга сүгүрүйэн, Аал уоппутун арыылаах алаадьынан, саламаатынан айах тутан көрдөстө. Нэһилиэкпит эр дьоно байанай бэлэҕиттэн күндүлээннэр, олохтоох дьаһалта эр дьоно кус миинэ буһаран, далбар хотуттара алаадьы астаан, кыынньар утахтаах кымыһынан «Сайылык күнүн» көрсө нэһилиэк дьонун ыҥыран маанылаатылар. Култуура киинин үлэһиттэрэ көрдөөх оонньуулары оонньотон, ырыа күнүгэр аналлаах ырыа күрэҕин тэрийэн ылбаҕай ырыалар ылланнылар, ис сүрэхтэн истиҥ эҕэрдэлэр этилиннилэр, бултаабыт уоланнарга «Байанайдара тосхойо турдун!» - диэн махталларын тиэртилэр. Кэлбит дьон сүргэлэрэ көтөҕүллэн, үөрэн-көтөн тарҕастылар.