Кулун тутар 2 күнүгэр Хомустаах 2-с нэһилиэгэр нэһилиэкпит историятын үйэтитэр, олохтоох дьоммутун сырдатар үйэлээх кинигэ "Нам улууһун Хомустаах II-с нэһилиэгэ" краеведческай, историческай, библиографическай кинигэ күн сирин көрбүтүн сурэхтиир үөрүүлээх тэрээһинэ буолан ааста. Тэрээһини уонна кинигэ ис тутулун билиһиннэриитин үрдүк таһымнаахтык ыытта нэһилиэкпит киэҥ туттар киһитэ, 2-с Хомустаахха төрөөбүт-үөскээбит, Республикаҕа биллэр, Саха көрдөрөр иһитиннэрэр хампаанньа телевидениетын ыытааччыта, Россия суруналыыстарын сойууһун чилиэнэ, телевидение уонна радио туйгуна Георгий Белоусов. СӨ култууратын туйгуна, Нам улууһун Ытык киһитэ Ульяна Дмитриевна Сивцева-Ыллыктаах олус дириҥ ырытыылары, история чахчыларын хасыһан, көрдөөн, туруорсан үтүмэн үлүгэр, тугунан да кэмнэммэт үлэни оҥорбутун, ону сэргэ РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна уонна бочуоттаах бэтэрээнэ, Нам улууһун Ытык, Хомустаах 2-с нэһилиэгин Бочуоттаах киһитэ Мария Алексеевна Гоголева сыратын - сылбатын биэрэн туран архыып матырыйаалларын хасыһан, мунньан дьоммутун-сэргэбитин сурукка тиспитин нэһилиэгин дьонугар сиһилии кэпсээтэ. Онтон сүрүн идеятын биэрбит дойдутун дьонугар күүһэ кыайарынан көмөлөһө сылдьар, тумус туттар киһибит, СССР культуратын туйгуна, СӨ профтех үөрэхтээһинин туйгуна, Нам улууһун, Нам сэлиэнньэтин уонна Хомустаах 2-с нэһилиэгин Ытык киһитэ Мария Николаевна Габышева уонна кинилэргэ күүс-көмө буолбут Олесов К.А., Сивцева Н.И., Габышева Е.Н., Белоусов Г.Е. уонна кинигэни таҥан оҥорбут Нам Хатыҥ-Арыы нэһилиэгиттэн төрүттээх уоппуттаах редактор Эдуард Тимофеевич Пономарев. Бу күн үтүө тыл бастыҥа, эҕэрдэ истиҥэ этилиннэ. Нэһилиэк историята XII үйэттэн бу күҥҥэ диэри сырдатыллыбыт. Кинигэ 300 ахсаанынан норуот үбүнэн бэчээттэммит. Туруу үлэһит дьону, ыаллары, ыччаты үйэтитэр историческай, краеведческай уонна библиографическай дьоһун кинигэ таҕыста.