Тохсунньу 31 күнүгэр сэрии, үлэ бэтэрээнэ, ыччат наставнига Осипов Афанасий Авксентьевич 100 сылыгар аналлаах "ОЛОҔУМ ҮЛЭНИ ӨРӨ ТУТАРГА ҮӨРЭППИТЭ"-диэн ахтыы киэһээтин тэрээһинэ буолан ааста. Сүрдээх ис хоһоонноох,бары өттүнэн сиппит хоппут, таҥыллыбыт киһини эрэ астыннарар, дуоһутар Афанасий Афксентьевич оҕолоро, ис сүрэхтэриттэн кыһаллан, бары хайысханан аҕаларын, эһэлэрин сырдык кэриэһигэр 100 - сааһын бэлиэтээн, нэһилиэктэрин дьонугар дьоро күнү тэрийдилэр. Чуолаан Афанасий Афксентьевич улахан кыыһа, Александра Афанасьевна иилээн - саҕалаан, сүүрэн - көтөн ахтыы ылан, слайдаҕа театр артистарын кэпсэтэн, аҕатын үлэтин - хамнаһын, ол кэмнээҕи кэми арыйан көрдөрбүтэ, көрөөччүлэри долгутта даҕаны, сонун көстүү да буолла. Бу курдук олорон ааспыт ытык дьоннорбут оҕолоро, дьонноругар дириҥ убаастабыллара, кинилэринэн киэҥ туттуулара, холобур оҥостоллоро. Сүгүрүйэр, махтанар ытык иэстэрэ буоларын туоһута буоллаҕа... Торжественнай кэнниттэн салгыы, остуол тула олорон ыҥырыылаах ыалдьыттар, оҕолоро сиэннэрэ, бииргэ алтыспыт нэһилиэгин дьоно, Афанасий Авксентьевич аймахтара, кэргэнин Александра Алексеевна чугас дьоно, истиҥ - сылаас тылынан ахтан - санаан, ол ааспыт кэм үтүө өйдөбүлгэ хаалбыт түгэннэрин, иһирэхтик ахтан санаан аастылар. Сиэннэрэ эһэлэрин эппит кэс тылларын, сүбэтин - аматын өйдүү - саныы сылдьалларын долгуйа аҕыннылар. Афанасий Авксентьевич Осипов 100 - сааһыгар былааннаммыт тэрээһиннэр, үрдүк таһымҥа буолан аастылар.