Миитэрэй Наумов тыа сирин олоҕун араас өрүттэрин көрдөрөр «ОҔУСТАР ЗАБАСТОВКАЛАРА» комедийнай пьеса.

Сэтинньи ый 23 күнүгэр «Сэргэлэх» култуура киинигэр Саха норуодунай суруйааччыта, драматург, СӨ норуотун хаһаайыстыбатын үтүөлээх үлэһитэ, Амма, Үөһээ Бүлүү, Томпо улуустарын, Соморсун, Сулҕаччы нэһилиэктэрин бочуоттаах олохтооҕо Дмитрий Федосеевич Наумов – Миитэрэй Наумов, Саха норуотугар тыа сирин олоҕун араас өрүттэрин көрдөрбүт «Оҕустар забастовкалара» диэн икки оонньуулаах, алта хартыыналаах комедийнай пьесата буолла. Бу пьесаҕа оонньооччулар тыа дьонун – сэргэтин күннээҕи түбүгүн, үөрүүтүн – көтүүтүн, иэйиилээхтик, көрүдьүөстүк, эмиэ да киһи сонньуйуон курдук оонньоон көрдөрөннөр көрөөччүлэри күллэрэн дохсун ытыс таһыныылаах дьон биһирэбилин ыллылар. Оруолларга оонньоотулар нэһилиэк олохтоохторо: Тэриэс оҕонньор – Старков Андрей Петрович – дэриэбинэ кырдьаҕаһа, дьээбэлээх – хооболоох, суон малтайбыт оҕонньор. Оҕустаах Дуунньа – Протопопова Евдокия Кимовна – саас ортолоох, уруккута совхоз отделениетын зоотехнига, дьон туһугар кыһаллар, өйдөөх санаалаах киһи. Матайар Мааса – Трапезникова Светлана Васильевна – уҥаны- хаҥас, хараны – үрүҥ диэбит хотун. Кулун Уйбаан – Иванова Мария Анатольевна – өрүү кур холуочук табаарыс. Баһылык - Пестряков Иннокентий Ефимович – саҥа талыллыбыт нэһилиэк баһылыга, уруккута физкультура учуутала. Зоотехник – Попова Саргылана Семеновна – улуус тыатын хаһаайыстыбатын управлениетын специалиһа. Кэтириинэ – Слепцова Александра Романовна – масласыахха үлэлиир дэриэбинэ дьахтара. Өкүлүүнэ – Иванова Мария Анатольевна - дэриэбинэ дьахтара.

- Тэриэс оҕонньор

- Баһылык, Кэтириинэ, Оҕустаах Дуунньа.

- Кэтириинэ, Тэриэс оҕонньор, Матайар Мааса, Өкүлүүнэ

- Тэриэс оҕонньор, Өкүлүүнэ, Кэтириинэ.

- Баһылык, Зоотехник, Тэриэс оҕонньор, Оҕустаах Дуунньа, Кэтириинэ, Өкүлүүнэ, Матайар Мааса, Кулун Уйбаан.

"Сомоҕолоһуу - биһиги күүспүт" - оскуола оҕолоругар аналлаах өй күрэһэ.

2005 сыллаахха Арассыыйа бэрэсидьиэнин ыйааҕынан сэтинньи 4 күнэ Сомоҕолоһуу күнүнэн биллэриллибитэ. Онон бу күн дойду үрдүнэн араас норуот сомоҕолоһуутун бэлиэтиир кэрэхсэбиллээх күндү күнүнэн биллэр. Бу күн чэрчитинэн сэтинньи 3 күнүгэр «В единстве-наша сила» кинигэ быыстапката турда уонна 2 Хомустаах орто оскуолатын үөрэнээччилэригэр «Сомоҕолоһуу — биһиги күүспүт!» диэн өй күрэҕэ буолан ааста. Тэрээһин саҕаланыытыгар Сомоҕолоһуу күнүн историята сырдатылынна. Оҕолор үс хамаандаҕа арахсан оонньоотулар. («Бравл-Старс», «Минионы»,» Единство»). Ыйытыктарга хоруйдаан кыайыылааҕынан таҕыстылар «Минионнар» хамаандалара, иккис миэстэ «Бравл-Старс,», үһүс миэстэ «Единство». Оҕолор бары бэйэлэрин дьиннээх патриот быһыытынан көрдөрдүлэр. Хас биирдии хамаанда грамотанан, бирииһинэн наҕараадаланнылар. Оҕолор дуоһуйа оонньоон, үҥкүүлээн сынньалаҥ киэһэлэрин көхтөөхтүк атаардылар. Оонньууга көхтөөх кыттыыны ылбыт оҕолорго барыларыгар тэрийээччилэр ааттарыттан барҕа махталбытын тиэрдэбит.

Россияҕа анаммыт "Аҕалар" уонна "Суоппардар" күннэригэр аналлаах «Эркин курдук эр дьоммутугар, Ордоо-дугуй уолаттарбытыгар» күрэх

Сэтинньи ый 3 күнүгэр Россияҕа анаммыт "Аҕалар" уонна "Суоппардар" күннэригэр аналлаах «Эркин курдук эр дьоммутугар, Ордоо-дугуй уолаттарбытыгар» күрэх, түөлбэлэр икки ардыларыгар өрө күүрүүлээхтик ыытылынна. Күрэхтэһиини иилээн - саҕалаан, тэрийэн ыыттылар "Сэргэлэх" култуура киинин специалиһа Василий Николаевич Чемпин уонна спорт киинин инструктора Ньургуяна Григорьевна Протопопова. Күрэхтэһии 4 этаптаах ааста. 1 этап "Корн-хол", 2 этап "Сыал ытыы", 3 этап "Хапсаҕай" онтон +45 үөһэ "Муҥха тардыһыы" кииристилэр. Бүтэһиктээх 4 этап долгуйуулаах "Канат тардыһыыта" буолла. Күрэххэ түөрт түөлбэ көхтөөх кыттыыны ылан, күрэх түмүгүнэн 1-кы миэстэни "Сайдам" түөлбэ, 2-с миэстэни "Дьулуур" түөлбэ, 3-с миэстэни "Чагда" түөлбэ, 4-с миэстэни "Сатас" түөлбэ ыллылар. Кыайыылаахтар анал грамотанан уонна мэдээлинэн наҕараадаланнылар. Түөлбэлэригэр ыалдьа кэлбит хас биирдии көрөөччү күрэх кыттааччыларыгар ыһыытаан-хаһыытаан, ыалдьан долгуйдулар, ытыс дохсун тыаһынан үөрэ-көтө көрүстүлэр, умнуллубат кэрэ түгэни атаардылар.

Саха сирин Ийэлэрин күнүгэр аналлаах "Ийэм сылаас мичээрэ 2024сыл" көлүөнэлэр икки ардыларыгар күрэх.

Алтынньы ый 19 күнүгэр Саха сирин Ийэлэрин күнүгэр аналлаах «Ийэм сылаас мичээрэ-2024 сыл» көлүөнэлэр икки ардыларыгар күрэх буолла. Бу күрэххэ уопсайа 26 кыттааччы кытынна. Күрэх уопсайа 5 түһүмэхтээх ааста. Көлүөнэлэр олус кыһаллан, тэринэн, оҥостон кэлбиттэрэ өтө көстөр. Ол курдук жюрига олорбут эр бэртэрэ Протопопов Вячеслав Афанасьевич, Охлопков Афанасий Семенович, Протопопов Никита Александрович, Чемпин Василий Николаевич кэргэттэрин, эдьиийдэрин, балыстарын сыанаттан олох атын өттүлэрин көрөн долгуйдулар, биһирээтилэр. «Фотозона», «Стиль таҥас», «Музыкальный жанр», «Ыйыытыыга эппиэттээһин» уонна «Авангард муода» түһүмэхтэрэ өрө күүрүүлээхтик барда. Бу киэһэ ис дууһаттан кыһаллан,тэринэн кэлбит көлүөнэлэрбит ийэлэригэр күрэх түмүгүнэн дьүүллүүр сүбэ кыайыылаахтарга уонна кыттыбыттарга «Сэргэлэх» култуура кииниттэн анал грамота, бэлэх уонна олохтоох торт астааччыларбыт Потапова Ньургустана Петровна уонна Протопопова Ньургуяна Григорьевна минньигэс тортарынан күндүлээтилэр. 1-кы бочуоттаах миэстэни Аҕам саастаах көлүөнэлэр, 2-с миэстэни Орто көлүөнэ, 3-с миэстэни Эдэр көлүөнэ ылла. Көрөөччүлэр дохсун ытыс тыаһынан хас биирдии кыттааччы көлүөнэлэри үөрэ-көтө көрсө умнуллубат кэрэ күнү атаардылар.

Аан дойдуга аҕам саастаах дьон күннэригэр анаммыт декада чэрчитинэн, алтынньы ый 5 күнүгэр балаҕан дьиэҕэ «Истиҥ санааттан» бырааһынньыктааҕы тэрээһин ыытылынна. Бу тэрээһиҥҥэ кимиэхэ ханнык от баарынан «Алгыстаах чүмэчи» маастар кылаас Сардана Анатольевна көрдөрөн сэҥээриини ылла. «Көмүс күһүн кэрэтэ» - муода күрэҕэр Петухова Парасковья Николаевна, Павлова Мария Ивановна, Сивцева Надежда Ивановна кытыннылар. Бэйэ-бэйэлэрин кытта ис-сүрэхтэн эҕэрдэлэһэн, оонньоон, иһирэх кэпсэтиилэри истиҥник кэпсэтиһэн үөрэн-көтөн тарҕастылар.

Алтынньы ый 3- 4 күннэригэр Уус Алдан улууһун Бороҕон нэһилиэгэр Саха сирин култуура үлэһиттэрин Республиканскай методическай форума ыытылынна. Бу икки күҥҥэ Саха сирин 15 улууһун култуура үлэһиттэрэ бэйэ-бэйэлэрин кытта көрсүһэн үлэлиир хайысхаларынан бөлөх бөлөххө секцияларга арахсан кэпсэтиһэн, билсиһэн, бэйэлэрин үлэлиир бырайыактордарын ирэ-хоро кэпсэтиһэн санаа атастаһан, үлэҕэ-хамнаска туһанар сыаллаах буолла. Маннык улахан форумнар, семинардар кэлин өссө да ыытылларыгар баҕардылар.